2024 йил 30 июль куни видеоалоқа орқали Ўзбекистон Лизинг Уюшмасининг 2024 йил 1-ярим йиллиги якунларига бағишланган йиғилиши бўлиб ўтди. Йиғилиш давомида ҳисобот даври якунлари сарҳисоб қилинди ва мамлакатда лизинг бозорини ривожлантиришнинг келгуси вазифалари ва устувор йўналишлари белгиланди.
2024 йилнинг 1-ярим йиллиги якунларига кўра, республикада лизинг хизматлари бозорида 155 га яқин иштирокчи мавжуд бўлиб, улардан 36 таси фаол равишда лизинг фаолияти билан шуғулланмоқда. Лизинг операцияларининг умумий портфели ҳисобот даврида 7,4 трлн. сўмдан ошган. Ҳисобот даврида лизинг берувчилар томонидан 7500 дан ортиқ янги лизинг битимлари тузилган, уларнинг ҳажми 2 трлн. сўмни ташкил этган, бу 2023 йилнинг шу даврига нисбатан 13,6% кўп.
Йил якунларига кўра, лизингга берилаётган объектлар орасида қишлоқ хўжалиги техникаси етакчилик қилмоқда, унинг лизинг битимларининг умумий тузилмасидаги улуши 66,3% ни ташкил этган. Иккинчи ўринда автотранспорт воситалари бўлиб, унинг улуши 17,1% ни, технологик ускуналарнинг улуши эса 8,0% ни ташкил этган. Ўз навбатида, қурилиш техникаси ва ускуналарини лизингга бериш кўрсаткичлари пасайиб, 6,8% ни ташкил этган. Кўчмас мулкни лизингга бериш билан боғлиқ битимлар ҳажми 1,9% ни ташкил этган.
Кўриб чиқилаётган даврда лизинг берувчилар орасида «O’zagrolizing» АЖ (980,3 млрд.сўм), «Mikro Leasing» ХК МЧЖ (312,2 млрд. сўм), «Uzbek Leasing International A.O.» АЖ (197,9 млрд. сўм), Fincom Leasing Group (187,1 млрд. сўм) ва «Autosanoat Agro Lizing» МЧЖ (121,6 млрд. сўм) бозор етакчиларига айланди.
2024 йилнинг 1-ярим йиллигида амалга оширилган янги лизинг битимларида ҳудудлар орасида энг катта улушни Тошкент шаҳри эгаллади — 15,6%, иккинчи ва учинчи ўринларни Қорақалпоғистон Республикаси ва Фарғона вилояти эгаллади – мос равишда 8,7% ва 8,6%.
Ўз тақдимотида Ўзбекистон Лизинг Уюшмаси раиси Зафар Мустафаев лизинг соҳасининг жорий муаммоларини таъкидлаб ўтди: мижозлар орасида лизинг бўйича тўловларнинг ўсмаслиги, суд ишларининг чўзилиши ва лизинг объектларини олиб қўйиш, шунингдек лизинг олувчиларнинг виждонсизлиги. Тақдимот якунида лизинг муҳитини яхшилаш ва соҳа нуфузини оширишга ёрдам берадиган таклифлар айтиб ўтилди.
Таклиф этилган маърузачилар: TEAM университети, «Moy Buxgalter» компанияси, шунингдек HR соҳасидаги ментор, бизнес-маслаҳатчи – Полякова Алсу.
Тақдимотларнинг тўлиқ варианти қуйидаги ҳавола орқали мавжуд:
https://drive.google.com/drive/folders/1COQsvV0l7I-Zqiz3nY3Fx4S_ZyC8EW8p?usp=drive_link
